माङसेबुङ: लिम्बूहरुको सामाजिक संस्था किरात याक्थुङ चुम्लुङले राष्ट्रिय जनगणनामा धर्मको महलमा ‘किरात’ लेख्न आम लिम्बू समुदायमा अपिल गरेको छ ।
चुम्लुङले जाति, मातृभाषा र पुख्र्यौली भाषामा ‘लिम्बू’ नै लेख्न समेत अपिल गरेको छ । जनगणनाका लागि जाति, मातृभाषा र पुख्र्यौली भाषामा लिम्बू र धर्ममा किरात लेख्नका लागि आगामी मंसिरपछि समुदायमा अभियान चलाइने चुम्लुङका अध्यक्ष योगराज वनेमले बताउनु भएको छ ।
वनेमका अनुसार चुम्लुङले २०७६ सालको राष्ट्रिय सम्मेलन, सोभन्दा अगाडिको अन्तर्राष्ट्रिय सम्मेलन तथा महाधिवेशनहरुले निर्णय तथा अनुमोदन गरेअनुसार नै २०७८ को जनगणनामा धर्ममा किरात लेख्न अपिलसहित अभियान चलाउन लागेको जर्नाको छ ।
लिम्बूहरुमा मौलिकताको बहस जारी भए पनि जनगणनामा तथ्यांकको महत्व हुने भएकोले अहिलेका लागि किरात धर्म नै लेखाएर जानुपर्ने चुम्लुङको धारणा रहेको वनेमको भनाई छ ।
तथ्यांकलाई बलियो बनाउने र एकजुट बनाउने सन्दर्भ भएको हुनाले धर्मको महलमा किरात नै लेखेर जाऔ भन्ने धारणा रहेको छ वनेमले बताउनु भयो ।
‘लिम्बुभित्र पछिल्लो समय धर्मको विषयमा किरात कि युमा भन्ने बहस जारी छ भने जातिको विषयमा समेत लिम्बू कि याक्थुङ भन्ने बहस छ । जातिमा लिम्बु भन्दा याक्थुङ लेख्दा मौलिक हुने कतिपयको तर्क रहेको छ ।
नेपालमा हरेक दश वर्षमा हुने राष्ट्रिय जनगणना आगामी २०७८ साल जेठ २५ देखि असार ८ गतेसम्म सञ्चालन हुनेछ ।
Discussion about this post