काठमाण्डौ, कात्तिक २५ ।
किरात धर्म दर्शनदाता, मुहिङगुम अङसीमाङ राष्ट्रिय विभूति महागुरु फाल्गुनन्द लिङ्देन १३६औं जन्मजयन्तीको अवसरमा सम्बन्धित संघीय मन्त्रालयले आज शुभकामना सन्देश सार्वजनिक गरेको छ।
संस्कृति, पर्यटन तथा नागरिक उड्डयन मन्त्री योगेश भट्टराईद्वारा दिइएको शुभकामना सन्देशमा भनिएको छ –
नेपालका राष्ट्रिय विभूति समाज सुधारक महागुरु फाल्गुनन्दको १३६ औं जन्म जयन्तीको अवसरमा सम्पूर्ण नेपाली दिदी-बहिनी तथा दाजु-भाईमा हार्दिक शुभकामना व्यक्त गर्दछु।
आफ्नो जीवनको अन्तिम पलसम्म भाषा, संस्कार, संस्कृति, शिक्षा उत्थान तथा समाज सुधारका निम्ति लाग्नु भएका फाल्गुनन्दले समाज सुधारका लागि वि.सं. १९८८ बैशाख २४ गते स्थापना गर्नुभएको ‘सत्य धर्म मुचुल्का’ को नीति विश्व समुदायले अनुशरण गर्ने गरेको छ ।
वि.सं. १९४२ कार्तिक २५ गते पूर्वी पहाडी जिल्ला इलामको एक सामान्य किसान परिवारमा जन्मनु भएका उहाँले जीवनको सवै समय कुरीति र कुसंस्कारमा जकडिएको समाजको सुधारमा खर्चिनु भयो । अनावश्यक तडक-भडक नियन्त्रण र मौलिक संस्कृतिको जगेर्नाका लागि उहाँले जारी गर्नुभएको १० बुँदे लिखित मुचुल्कामा श्रीजंगा लिपिमा अध्ययन गराउने, मादक पदार्थ सेवन नगर्ने, छोराको विवाहमा दान नलिने, स्वदेशी कपडा लगाउने, छोरा र छोरीलाई समान शिक्षा दिने लगायतका कुरा उल्लेख थिए ।
समाज सुधारक फाल्गुनन्दका प्रेरणादायी उपदेश र मार्गदर्शनको पालना गर्न सकेमा धार्मिक, सामाजिक तथा सांस्कृतिक सहिष्णुता र सद्भाव कायम गर्दै राष्ट्रिेय एकतालाई अझ सबल र कसिलो वनाउन सकिनेछ । उहाँको जन्मदिनको शुभ अवसरमा हामी सबैमा उहाँको मार्गदर्शनमा अगाडी बढ्ने थप उर्जा र प्रेरणा प्राप्त होस । हार्दिक शुभकामना ।
Discussion about this post