माङसेबुङ : राष्ट्रिय विभूति एवं किरात धर्मावलम्बीका महागुरु फाल्गुनन्द लिङ्देनको जन्मजयन्ती आज धुमधामका साथ मनाइएको छ।
१९४२ कात्तिक २५ गते इलामको माङसेबुङ गाउँपालिका–२ चुक्चिनाम्बामा जन्मिनुभएका फाल्गुनन्दले समाज सुधारका लागि खेल्नुभएको भूमिकाको सम्मान गर्दै उहाको जन्मजयन्ती धुमधामका साथ मनाइएको हो ।
विश्वव्यापी रुपमा फैलिएको कोरोना भाइरसका कारण १३६ औं जन्मजयन्ती कार्यक्रम स्वास्थ्य मापदण्डका साथ विभिन्न स्थानमा विश्व शान्तिको कामना गर्दै सावायेत नाम्धुङ लाधुङ सेमी सेवा र साभ दिप प्रज्वलन गरेर मनाइएको छ ।सोही अवसरमा इलामको माङसेबुङमापनि विभिन्न कार्यक्रमका साथ कार्यक्रम सम्पन्न भएको छ । रेडियो माङसेबुङको आयोजनामा महागुरु फाल्गुनन्दको जीवन दर्शनबारे भर्चुअल कार्यपत्र प्रस्तुत गरे । स्थानीय युवा समाजसेवी रोशन राई, यलम्बर साबा, सुरेश आङबोको सहयोगमा भर्चुअल कार्यक्रम रेडियो माङसेबुङमा प्रत्यक्ष प्रसारण समेत गरिएको थियो । फाल्गुनन्दबारे अध्येता आङबुहाङ अबोध अबिरले कार्यपत्र प्रस्तुत गरेका थिए ।
फाल्गुनन्द जयन्तीको अवसरमा शुभकामना सन्देश दिनुहुदै राष्ट्रपति विद्यादेवी भण्डारीले हामी सबैलाई समाजमा रहेका विकृति र विसंगति हटाउँदै प्रगतिशील, सभ्य र समुन्नत समाजको निर्माण गर्नका लागि समाज सुधारका अभियानमा लाग्ने प्रेरणा प्रदान गरोस् भन्ने कामना गर्नुभएको थियो ।
किरात धर्मावलम्बीहरुले पाँचथर, ताप्लेजुङ, तेह्रथुम, इलाम, झापा, धनकुटा, संखुवासभा, मोरङ, सुनसरीका साथै किरात धर्मावलम्बी रहेका क्षेत्रमा विभिन्न कार्यक्रम आयोजना गरी हरेक वर्ष कात्तिक २५ गते किरात पर्वका रुपमा जन्मजयन्ती मनाउने गर्दछन् । तर, यस वर्ष कोरोना संक्रमणको महामारीका कारण किरात धर्म तथा साहित्य उत्थान संघले किरात धर्मावलम्बीहरुलाई धेरै व्यक्ति भेला भएर जन्मजयन्ती नमनाउन अपिल गरेको थियो ।
वि।सं २००५ चैत २२ गते निधन भएका फाल्गुनन्दलाई २०६६ मंसिर १६ गते तत्कालीन प्रधानमन्त्री माधव नेपाल नेतृत्वको सरकारले राष्ट्रिय विभूति घोषणा गरेको थियो।
फाल्गुनन्द जीवन दर्शनबारे कार्यपत्र हेर्नुहोस भिडियो
Discussion about this post